Nasce la Banca della Memoria Siciliana: iniziativa promossa dall’Associazione SicilyBook cultura e turismo. Chiunque può contribuire!

1. 

   Luigi Manzo dice:

   25 Marzo 2023 en 15:32

   LA FERA DI MEZZ’AUSTU

   Era la fera di lu mezz’austu.
   Li picciotti l’aspittavanu sta festa
   ci l’avianu a purtari a ogni costu.
   Ognunu facia la so richiesta.

   Li firanti vinianu di Casteddruvitranu,
   puru di Mazara e anchi di Partanna.
   Chiddru di l’ombrelli era palermitanu
   cu li paracca attaccati a nna rossa canna.

   Li matri cu li figghi cuntenti arrivavano,
   lu chiù picca nn’avia centu disideri.
   Mentri autri chiancennu s’inni ianu.
   Picchì li prumisi un foru mai sinceri.

   Nna picciriddra comu nna pazza vuciava
   chi soccu ci accattà so matri un ci piacia;
   un cerchiettu p’arriccamari sbattuliava
   e cu lacrimi longhi chi chiancia.

   Mastru Brasi chi vinnia la ranita
   li picciotti di ncapu un si putia livari,
   a cu ci paria duci e a cu troppu scipita
   ma a tutti ci piacia lu conu di liccari.

   Chiddri di la terraglia cu migghiara di piatti,
   misi unu ncapu l’autru chi parianu turri.
   la marca l’avianu, ma eranu contraffatti,
   culurati di marrò, d’oru e puru azzurri

   Dintra du barracchi veru beddri,
   boni alliniati nta tanti ripiani,
   bucala, biccheri e tanti bacareddri
   eranu l’ammirazioni di li cristiani.

   Cu nna vuci forti di veru battagghiera
   nna firanti la so robba abbanniava,
   chi comu chiddra d’iddra un ci nn’era,
   e li passanti a cumprari sempri mmitava.

   Scupi, coffi, zimmili e muscalora,
   scali, maiddri, paletti e lasagnatura
   oggetti utili tinuti esposti fora,
   l’epuca moderna ni persi la cultura.

   L’ortulanu cu li sparaci e li brocculi,
   llu tavirneri cu l’acitu e lu vinu,
   lu fallignami cu lu scannaturi pi li gnocculi
   e lu carritteri cu u beddru carruzzinu.

   Quannu t’avii firriatu tutta la fera,
   nfunnu, nta la gnuni di la vecchia chiesa,
   truvavi la pupa; e puru lu cavaddru c’era,
   nta la barracca di la zi Teresa.

   Abbicinari a lu bancuni era nna mprisa.
   li picciriddri sciamavanu comu l’api.
   Li matri eranu pronti a fari la spisa,
   anchi si po’ avianu tanti rattacapi.

   S’un ti strazzavanu li robbi eri furtunatu,
   la cunfusioni, lu baccanu, li peri pistati.
   Coddrusiccu di lu patruni fu attrappatu,
   e li cosi arrubbati lassà a bia di lignati.

   Tuttu lu chianu di genti era chinu
   nta lu Rimitu c’era sciavuru d’arrustu.
   Un toccu di sosizza e un biccheri di vinu
   chista era la festa di lu mezzaustu.

   GENUEFFA

   Unn’appi furtuna cu l’amuri.
   La vampa c’addrumà nta lu so cori
   pi virità appi picca durata:
   nna disgrazia la lassà scunsulata.
   Un suppurtava lu nivuru e li gramagghi
   e un si stancava di mordiri la brigghia
   Comu nna puddritra di lu morsu frinata,
   scalpitannu passava la nuttata
   Lu niru nta l’alcova arristà vacanti,
   iddra un persi tempu e si truvà l’amanti.
   La ragiuni si ci bloccà e agia d’istintu.
   Un pinzeri fissu avia: rimpiazzari l’estintu.
   Un omu circava, basta c’avia li pantaluna,
   anchi si dintra mancavanu li ‘buttuna’.
   Cu lu primu chi truvà, finì a frittata;
   e si ritruvà delusa e amariggiata.
   Un si rassignò a la mala sorti,
   tintà e ritintà ancora chiù vorti.
   Mai cuntenta, sempri ci ripruvava:
   l’omu giustu pi iddra mai truvava.
   Ora, scamusciuta e avanti cu l’anni,
   china di acciacchi e cu tanti affanni,
   pi forza, s’accuntità a malincori
   di l’urtimu chi ci chiesi amuri.
   S’accuntintà di lu modestu risultatu
   e pari finalmenti la paci aviri truvatu.
   Gino Manzo

   Rispondi

Lascia un Commento